Новости : Выльторъяс
05-10-2009 

Коми Республикаса Государственнöй Сöветöн веськöдлысь Марина Истиховская ветлiс аслас уджмогъясöн Печораö


Октябрь 1 лунö Коми Республикаса Государственнöй Сöветöн веськöдлысь Марина Истиховская ветлiс аслас уджмогъясöн Печораö. Сэнi сiйö волiс Соколов сиктö, кöнi кыпöдöны выль школа, пуктiс дзоридзьяс Иван Егорович Кулаковлы сиöм казьтылан пöв дорö, чолöмалiс Олöма йöзлöн лунöн втеранъясöс, аддзысьлiс 96879 номера войскöвöй часьтын служитысьяскöд да вочавидзис сы дорö асланыс тöжд-могöн шыöдчысьяслöн юалöмъяс вылö.

Соколов сиктын начальнöй школалы выль стрöйбасö заводитiсны кыпöдны 2009 вося августын. Кыдзи гöгöрвоöдiс «Печора» муниципальнöй районса юралысь Василий Торлопов, проектсö дасьтiсны да стрöйбасö кыпöдöны Печораысь специалистъяс. Проектыслöн доныс 7 миллион шайт. Школасö эштöдасны таво октябрын.

Марина Истиховская тöдчöдiс, мый Печора – дзик öти район, кöнi таво меставывса бюджет весьтö кыпöдöма этша лыда велöдчысьяслы кык школа. «Татшöм проектнас вермасны вöдитчыны и мукöдлаын», – пасйис спикер.

96879 номера войскöвöй часьтын служитысьяскöд Госсöветöн веськöдлысьлысь аддзысьлöмсö вöлi сиöма Россияса космическöй войскалöн лунлы. Аслас чолöмалана кывйын М.Истиховская шуис: «Быд пöрйö тiянкöд аддзысьлiгöн ме гöгöрвоа: миян странаын космосыс – зумыд киясын». Сiйö аттьöалiс военнöйясöс кывкутöмöн да бура служитöмысь. «Тiян вылö видзöдöмöн позьö эскöдны призывникъясöс, мый армияын служитысьясöс оз сöмын нимöдны, но и пыдди пуктöны да вылö донъялöны», – пасйис М.Истиховская.

Журналистъяслöн юалöмъяс вылö вочавидзигöн Госсöветöн веськöдлысь висьталiс, мый торйöн нин кывкутö Печоралöн аскиа лун вöсна, мед сэнi олысьяслöн ставыс вöлi бур. «Печораö менам бöръяысь волöмсянь коли во. Ме аддза, кутшöм уна бур вежсьöм лоöма карас сэксянь, кутшöма мичаммöма сылöн чужöмбаныс, кутшöм кыпыд оланруаöсь танi йöзыс. Тöда, Печораын мытшöд-падмöгыс абу этша, и нимкодь, мый на пиысь унаöс босьтчöмаöсь нин бырöдны», – пасйис М.Истиховская.

Новости : Выльторъяс
 


При использовании материала ссылка на сайт Государственного Совета
Республики Коми (gs.rkomi.ru) обязательна.

 

Webmaster