Новости : Выльторъяс
30-09-2009 

Коми Республикаса Государственнöй Сöветöн веськöдлысь Марина Истиховская: «Банкроталöм йылысь оланпасö пыртöм вежсьöмъяс сетасны позянлун дорйыны уджалысьясöс»


Сентябрь 29 лунö Нарьян-Марын (Ненеч автономия кытшын) чукöртчылiс Россияса Рытыв-Войвыв парламент ассоциациялöн президиум. Коми Республикаысь ветлiсны сэтчö Государственнöй Сöветöн веськöдлысь Марина Истиховская да сiйöс вежысь Станислав Хахалкин.

Президиумлöн чукöртчылiгöн вöлi видлалöма 11 юалöм. Марина Истиховская торйöн пасйис банкроталöм йылысь федеральнöй законö вежсьöмъяс пыртöм кузя ассоциацияöн вöзйöм оланпас балалысь тöдчанлунсö. Öнi тайö законыс оз тырвыйö дорйы предприятиеöс банкроталiгöн сэнi уджалысьяслысь правояссö. Рытыв-Войвылысь парламентарийяс вöзйöны удждон дорйöм йылысь удж кузя войтыркостса котырлöн 95 номера договор вылö подуласьöмöн пыртны сэтчö вежсьöмъяс. Тайö документ сертиыс, предприятиеöс банкроталiгöн (либö суд пыр сiйöс бырöдiгöн) сэнi уджалысьяслы, кыдзи кредиторъяслы, медвойдöр вештöны удждонсö. Та дырйи тайö договорас 11-öд статьяын стöча урчитöма, мый предприятиеын зiльысьяслы удждонсö колö вештыны ставнас мукöд кредиторыслöн асланыс пайла шыöдчытöдз.

Марина Истиховскаялöн видзöдлас серти, законö татшöм вежсьöмъяссö пыртöм бöрын лоас позянлун дорйыны уджалысь йöзöс. «Öнi ми тшöкыда аддзам, мый удждон вештöмыс предприятие-банкротъяслы абу зэв тöдчана. Найö зiльöны медвойдöр мынтыны мукöдлы уджйöзсö. Овлö, уджалысьясыс сэсся воясöн виччысьöны, кор мынтасны налы нажöткасö. Менам видзöдлас серти, кöть мый оз вöчсьы предприятие-банкротас, медтöдчана дорйыны сэнi уджалысьяссö», – пасйис Коми Республикаса Государственнöй Сöветöн веськöдлысь.

Сiйö сiдзжö юöртiс, мый президиумлöн шуöм серти, Россияса Рытыв-Войвыв парламент ассоциациялöн тайö веськöдлан котырыс бара чукöртчылас ноябрь 30 – декабрь 1 лунъясö Вöлöгдаын. Марина Истиховскаялöн гöгöрвоöдöм серти, буретш Вöлöгдаын 15 во сайын вöлi кырымалöма ассоциациясö котыртöм кузя документъяс, и сэнi ноябрь помын чукöртчылöмыс лоас тшупöда.

Новости : Выльторъяс
 


При использовании материала ссылка на сайт Государственного Совета
Республики Коми (gs.rkomi.ru) обязательна.

 

Webmaster