Новости : Выльторъяс
28-09-2009 

Сентябрь 25 лунö Коми Госсöветын республикаса парламентöн веськöдлысьяс аддзысьлісны ветеранъяслöн кар-районса сöветъясöн юрнуöдысьяскöд


Сентябрь 25 лунö Коми Госсöветын республикаса парламентöн веськöдлысьяс аддзысьлісны ветеранъяслöн кар-районса сöветъясöн юрнуöдысьяскöд.

Аддзысьлöм дырйиыс вöліны Коми Республикаса Государственнöй Сöветöн веськöдлысь Марина Истиховская да сійöс вежысьяс—Евгений Шумейко да Станислав Хахалкин.

Республикаса став кар-районын ветеранъяслöн котыръясын водзмöстчысьяс—52 морт—öні бурдöдчöны Максаковкаын дзоньвидзалун ёнмöдан шöринын.

Госсöветöн веськöдлысьяскöд налöн аддзысьлöмыс вöлі ветеранъяслöн быд вося чукöртчылöм водзвылын.

Сёрнисö панігöн Марина Истиховская чолöмаліс ветеранъясöс Олöма йöзлöн лунöн. «Буретш тайö праздник дырйиыс кивыв висьтавны бур кывъяс налы, кодъяс зэв уна бурсö вöчисны миян республикалы да страналы»,—пасйис М.Истиховская. Сійö тöдмöдіс ыджыд арлыда йöзöс «Войвылын олысьясöс лунвылöджык вуджöдöм йылысь» 125 номера федеральнöй оланпасö вöзйöмъяссö Интаысь ветеранъяскöд донъялöм бöрын вöчöм кывкöртöдъясöн, висьталіс медся ичöт пенсия арталöм могысь овны судзсьымöн сьöм урчитöм кузя сентябрь 24 лунö вынсьöдöм закон йылысь.

Ветеранъяс юксисны Государственнöй Сöветöн веськöдлысьяскöд асланыс тöжд-могöн. Интасаяс корисны парламентарийясöс стöча урчитны, Войвыв кытшбердса карысь уна-ö пенсионер-ветеранöс вермасны овмöдны лунвылöджык.
Чилимдін да Мылдін районъясса сöветъясысь ветеранъяс юасисны жилищно-коммунальнöй услугаясысь мынтысигöн кокньöд кузя. Сыктывкарсаяс майшасьöны, ветеранъяслöн кутшöм сöветö позяс шыöдчывны асланыс тöжд-могöн олöма йöзлы, кодъяс петісны пенсия вылö öні бырöдöм нин предприятиеясысь.

Коми парламентысь вице-спикер Станислав Хахалкинлöн видзöдлас серти, ветеранъяслöн котыръясöн водзмöстчысьяскöд татшöм аддзысьлöмъясыс зэв коланаöсь. «Ми насянь тöдмалам, кыдзи олöны ветеранъяс республикаса каръясын да сиктъясын, и тайö сетö миянлы позянлун дасьтыны оланпасъяссö олöма йöзлысь тöжд-могсö тöд вылын кутöмöн»,—пасйис Коми Госсöветöн веськöдлысьöс вежысь Станислав Хахалкин.

Новости : Выльторъяс
 


При использовании материала ссылка на сайт Государственного Совета
Республики Коми (gs.rkomi.ru) обязательна.

 

Webmaster