Новости : Выльторъяс
25-09-2009 

Коми Республикаса Государственнöй Сöветöн веськöдлысь Марина Истиховская аддзысьліс кар-районса газетъясысь главнöй редакторъяскöд


Сентябрь 24 лунö Сыктывкарын Государственнöй Сöветöн веськöдлысь Марина Истиховская аддзысьліс кар-районса газетъясысь главнöй редакторъяскöд. Аддзысьлöм дырйиыс вöлі тшöтш печать да юöр сетан Коми Республикаса агентствоöн веськöдлысь Дмитрий Челпановский.

Муниципалитетъясысь СМИ-ясöн веськöдлысьяс уджалісны Государственнöй Сöветын сентябрь 23-24 лунъясö. Найö волісны Госсöветлöн комитетъясын чукöртчылöмъяс да парламентлöн сессия вылö. Марина Истиховскаякöд аддзысьлігöн сёрниыс вöлі Госсöветлöн «Закон пöртсьö олöмö» уджтас збыльмöдöм йылысь. Госсöветöн веськöдлысь аттьöаліс главнöй редакторъясöс республикаса парламентлöн уджöн газет лыддьысьясöс тöдмöдöмысь. «Тыдалö, мый тіянлы окота гижны депутатъяс йылысь, тöдмöдны бöрйысьысьясöс миян уджöн»,—тöдчöдіс Марина Истиховская.

«Наша жизнь» газетса главнöй редактор Анастасия Одинцова висьталіс, кыдзи збыльмöдöны «Закон пöртсьö олöмö» уджтассö. Сылöн кывъяс серти, водзті налöн газетын Госсöветлöн удж йылысь йöзöдлісны сöмын юöръяс, а сэсся журналистъяс шуисны лыддьысьысьяскöд тшöтш донъявны закон балаяссö. Татшöм ногöн, тöдчöдіс А.Одинцова, оланпас дасьтысьяслöн эм позянлун кутны йöзыскöд йитöд, а лыддьысьысьяслы абу нин веськодь парламентарийяслöн уджыс, асьныс тшöтш вермасны сэтчö пырöдчыны да.

«Наша жизнь» газет лыддьысьяс донъялісны войнас крепыд курыд юантор вузалöмысь дугöдчöм, а сідзжö тыр арлыдтöмаясöс мыж вöчöмысь да лэдзчысьöмöн олöмысь öлöдöм кузя оланпасъяс. «Газетын та йылысь юöрыс вöрзьöдіс зэв уна йöзöс, а ачыс олöмыс эз нин öтчыдысь туйдлы миянöс гижны та йылысь»,—пасйис А.Одинцова. Матысса кадö «Наша жизнь» газетын лöсьöдчöны донъявны олöма йöзöс дöзьöритöм йылысь закон.

Марина Истиховская вочавидзис тайö оланпасыскöд йитöдын главнöй редакторъяслöн юалöмъяс вылö. Аддзысьлöм дырйиыс сёрни вöлі и республикаса бюджетö вежсьöмъяс пыртöм йылысь.

Кывкöртöд вöчигöн Государственнöй Сöветöн веськöдлысь тöдчöдіс, мый оланпасъяс донъялöм кузя кар-районса газетъяслöн уджыс отсалö депутатъяслы колана вежсьöмъяс пыртöмöн бурмöдны законъяссö. «Эска, миян öтувъя уджыс кутас мунны водзö, и республикаса кар-районъясын олысьяслöн лоас позянлун бурджыка тöдмасьны налы колана оланпасъясöн»,—шуис Марина Истиховская.

Новости : Выльторъяс
 


При использовании материала ссылка на сайт Государственного Совета
Республики Коми (gs.rkomi.ru) обязательна.

 

Webmaster