Новости : Выльторъяс
22-09-2009 

Чукöртчылiс «Россия Войвылын ГУЛАГ» став Россияса научнöй конференция нуöдöм кузя оргкомитет


Сентябрь 21 лунö Сыктывкарын чукöртчылiс «Россия Войвылын ГУЛАГ» став Россияса научнöй конференция нуöдöм кузя оргкомитет. Конференцияыс мунас октябрь 27-29 лунъясö Ухтаын.

Тайö карас сiйöс нуöдны урчитöма сы вöсна, мый буретш Ухтасянь пансис Коми Республикаын ГУЛАГ-лöн шог историяыс. 1924 воын Чибью ю вомö воис ОГПУ-лöн медводдза экспедиция, кöнi вöлi дзескыдiнын пукалысь, кулачитöм, ссыльнöй, а сiдзжö медалöм да караулысь 125 морт. Сёрöнджык танi лöсьöдiсны лагерь.

Коми Республикаса Государственнöй Сöветöн веськöдлысь, «Покаяние» фондöн юрнуöдысь Марина Истиховскаялöн видзöдлас серти, тайö лоöмторъяссö пыдiсянь да гöгöрбок зiльöны донъявны ГУЛАГ-лысь история туялысьяс. «Оргкомитетö воис нин 50-ысь унджык шыöдчöм. Кöсйöны волыны оз сöмын Россияысь, но и мукöд странаысь учёнöйяс, чужан му туялысьяс, музейын уджалысьяс. Сёрнисö шуöма нуöдны куим туйвизьöд: тайö Россия Войвылын ГУЛАГ-лöн история, мыжтöг мыждöмаяслöн духовнöй культура, Ухтаын СССР-са ОГПУ-НКВД-лысь тэчасъяс лöсьöдöм да тайö карас индустрия сöвмöдöм костын йитöд. Бöръя юалöм вылас видзöдласыс ёна торъялö, öд войвылöс сöвмöдöмкöд йитчöма уна сюрс мортлöн олöмын шог да дой», – пасйис М.Истиховская.

«Покаяние» фондса правленньöö да оргкомитетö пырысь Надежда Бушмановалöн кывъяс серти, «Покаяниелöн» тайö – Сыктывкарысь бокын медводдза на научнöй конференция. «Учёнöйяс, чужан му туялысьяс, музейын уджалысьяс кöсйöны ас синнас видзöдлыны, кöнi 80 во сайын вöлi пуктöма ГУЛАГ-лы подувсö», – висьталiс Н.Бушманова.

* * *
«Россия Войвылын ГУЛАГ» став Россияса научнöй конференциясö сиöма Европаса Асыв-Войвылын медводдза лагерьяс котыртöмсянь 80 во тырöмлы. Сiйöс нуöдöны политикаын мыжтöг мыждöмаяслöн Коми Республикаса «Покаяние» благотворительнöй общественнöй фонд, Россияса наукаяс академияысь Коми наука шöринса Кыв, литература да история институт, Ухтаса государственнöй техническöй университет Коми Республикаса правительстволöн, КР-са Государственнöй Сöветлöн да «Ухта» карса кытшысь муниципальнöй юкöнса администрациялöн отсöгöн. Чукöртчылöм дырйиыс шуöма видлавны XX нэм заводитчигöн политикаын власьтлы паныд сулалысьясöс мыждöм, 1917-1920 воясö ыджыдалысь государстволöн репрессивнöй политика, 1930-1950-öд воясö медводдза лагерьяс котыртöм да налысь тэчас сöвмöдöм кузя юалöмъяс.

Новости : Выльторъяс
 


При использовании материала ссылка на сайт Государственного Совета
Республики Коми (gs.rkomi.ru) обязательна.

 

Webmaster