Новости : Выльторъяс
22-09-2009 

Коми Госсöветысь депутатъяслы кöсйысисны 2009 во помöдз эштöдны республикаса «тошсялöм» нин стрöйбаясысь öтиöс


Улыс Чов посёлокын Сыктывкарса психоневрологическöй интернатын выль восянь позяс овмöдны ыджыд арлыда да вермытöм унджык йöзöс. Сэнi эштöдан выйын нин 82 мортлы узьлан корпус. Сентябрь 21 лунö Белла Забровскаялöн юрнуöдöм улын сэтчö волiсны Коми Республикаса Государственнöй Сöветысь бюджет, вот да экономическöй политика комитетысь депутатъяс.

«Республикаса Госсöветöн веськöдлысь Марина Истиховская сетiс миян парламентса комитетъяслы индöд волыны республикаса социальнöй учреждениеяс улö стрöйбаяс кыпöданiнö. Миян мог – ас синмöн видзöдлыны, кыдзи сэнi видзöны бюджетысь вичмöдöм сьöмсö да колö оз торйöдны деньгасö 2010 воын, – гöгöрвоöдiс Б.Забровская. – Сыктывкарса психоневрологическöй интернатыс менам бöрйысян кытшын, и ме зiля кутны син улын тайö социальнöй учреждениеас стрöитчöм кузя юалöмсö».

Интернатса директор Сергей Виноградовлöн висьталöм серти, выль узьлан корпуссö эштöдöм бöрын неуна чиныштас социальнöй учреждениеясö овмöдчöм могысь ыджыд арлыда да вермытöм йöзлöн öчередьыс. А татшöмыс талун 450 морт. Интернатö жö öнi вермасны босьтны сöмын куимсёöс. Ставнас республикаын верстьöяслы татшöм интернатыс вит.

Узьлан корпуссö кыпöдны босьтчылiсны 90-öд вояс заводитчигöн на, но уджыс öддзис сöмын 2009 восянь. Республикаса бюджетысь вöлi торйöдöма 48 миллион шайт. Кыдз тыдовтчис, стрöитчан уджыс мунö лючки. Помалöмаöсь нин вевтсö, öнi вöчöны сынöдсö тöлöданiнъяс, нюжöдöны шоныд сетан трубаяс да би провод. Первой да мöд судтаясас сувтöдöны гипсокартонысь стенъяс, коймöд судтаас тайö уджсö помалöмаöсь нин. Стройматериалыс да стеклопакетыс тырмымöн, но узьлан корпусас став коланасö ньбöм могысь колö нöшта 1,5 миллион шайт.

2010 воын шуöма кыпöдны куим судтаа галерея, кодi йитас выль узьлан корпуссö керка-интернатлöн мукöд стрöйбаыскöд. Тайö галереяас восьтасны интернатын олысьясöс медицина услугаясöн могмöдан жыръяс. Сiйöс кыпöдöм вылö ковмас 36 миллион шайт. Сьöмсö кö вичмöдасны, интернатыс лоас дась 2010 во помöдз, эскöдiсны депутатъясöс пöдрадчикъяс.

Татшöм учреждениеас Госсöветысь депутатъяслöн тайö волöмыс абу медводдза. Сентябрь 17 лунö социальнöй политика комитетö пырысьяс видзöдлiсны, кыдзи видзöны Княжпогост районса Емва карын батьтöм-мамтöм челядьлы коррекциннöй школалысь узьлан корпус кыпöдöм да 11 номера профессиональнöй училищелысь велöдчан корпус дзоньталöм могысь бюджетысь вичмöдöм сьöмсö.

Социальнöй стрöйбаяс кыпöдöм кузя öтувъя сёрниыс лоас сентябрь 24 лунö Госсöветлöн чукöртчылöм бöрын «Правительстволöн час» дырйи.

Новости : Выльторъяс
 


При использовании материала ссылка на сайт Государственного Совета
Республики Коми (gs.rkomi.ru) обязательна.

 

Webmaster