Новости : Выльторъяс
18-09-2009 

Комиысь депутатъяс кутöны син улас, кыдзи збыльмöдсьö социальнöй юкöнын стрöйбаяс кыпöдöм да дзоньталöмкöд йитöдын бюджет йылысь оланпас



Комиысь депутатъяс кутöны син улас, кыдзи збыльмöдсьö социальнöй юкöнын стрöйбаяс кыпöдöм да дзоньталöмкöд йитöдын бюджет йылысь оланпас.

Та кузя индöд сетіс КР-са Государственнöй Сöветысь президиумлöн чукöртчылігöн парламентса комитетъясöн юрнуöдысьяслы республикаса Госсöветöн веськöдлысь Марина Истиховская.

Сентябрь 17 лунö социальнöй политика комитетöн веськöдлысь Ольга Савастьянова да депутат Алексей Цыпанов тöдмасисны, кыдзи видзöны бюджетысь сьöмсö Княжпогост районса Емва карын бать-мамтöм челядьлöн коррекционнöй школалысь узьлан корпус кыпöдігöн да 11 номера профессиональнöй училищелысь велöдчан корпус дзоньталігöн. Кыдзи да мый вöчсьö сэні, висьталісны регионса йöзöс велöдöм кузя министрöс первой вежысь Сергей Козлов да Княжпогост муниципальнöй районса веськöдлысь Виктор Попов.

2009 воын коррекционнöй школалысь узьлан корпус кыпöдöм вылö вичмöдöм сьöмсö видзöма ставсö, но стрöйбасö эштöдöм могысь колö зэв на уна. Локтан воö бюджетысь сьöм вичмöдöм кузя шыöдчöм дасьтіс Комиысь йöзöс велöдан министерство.

11 номера профессиональнöй училищелöн велöдчан корпусын дзоньтасян уджсö шуöма помавны локтан во заводитчигкежлö. Дасьöсь нин классъяс, мукöд жыръяс, ньöбöма öнія пызан-улöс да выль велöдчан оборудование. В.Поповлöн кывъяс серти, выль велöдчан стрöйбасö помалöм бöрын Княжпогостса ДВП заводкöд öтвылысь позяс дасьтыны предприятиеыслы колана специалистъясöс да сетны сэні уджалысьяслы выль тöдöмлун. Таысь öтдор, училищеас позяс велöдны том йöзöс и мукöд профессияö. Öні сэні дасьтöны шоперъясöс да автомашина дзоньталысь слесарьясöс.

Депутатъяс сідзжö пасйисны муниципалитетын социальнöй тöжд-мог збыльмöдöм кузя районса власьтъяслысь зільöмсö.

Матысса кадö Комиысь парламентарийяс воласны нöшта некымын социальнöй учреждениеö. Сідз, сентябрь 21 лунö бюджет, вот да экономическöй политика комитетысь депутатъяс сэтчöс веськöдлысь Белла Забровскаялöн юрнуöдöм улын воласны Сыктывкарса Улыс Чов посёлокын пöрысь йöзлöн да вермытöмъяслöн керка-интернатö.

Новости : Выльторъяс
 


При использовании материала ссылка на сайт Государственного Совета
Республики Коми (gs.rkomi.ru) обязательна.

 

Webmaster