Новости : Выльторъяс
11-09-2009 

Коми Госсöветысь депутатъяслöн видзöдлас серти, колö бурджыка вöдитчыны бюджетысь сьöмöн


Коми Республикалысь 2008 вося бюджетсö тырвыйö пöртöма олöмö. Татшöм кывкöртöд вöчисны регионса Государственнöй Сöветысь депутатъяс сентябрь 9 лунö бюджет, вот да экономическöй политика комитетын чукöртчылігöн Коми Республикаса Юралысьöн вöзйöм «Коми Республикалысь 2008 вося бюджет олöмö пöртöм йылысь» закон бала донъялöм бöрын.

Белла Забровскаялöн юрнуöдöм улын тайö чукöртчылöм вылас волісны КР-са Юралысьöс первой вежысь Вячеслав Гайзер, республикаса парламентысь депутатъяс, видзöдан-артасян палатаöн, регионса прокуратураöн, КР-ын РФ-са юстиция министерстволöн управлениеöн веськöдлысьяс.

Депутатъяс водзвыв тöдмасисны кольöм вося бюджетысь сьöмöн вöдитчöм кузя юристъяслöн да финансистъяслöн кывкöртöдъясöн. Кыдз тыдовтчис, сьöмсö видзöмаöсь бюджет йылысь оланпасъяс вылö подуласьöмöн. 2008 вося бюджетын рöскодсö вынсьöдöма стöч лыдпасъясöн.

Та вылö видзöдтöг депутатъяс юалісны, мыйла öткымын статья кузя вичмöдöм сьöмсö видзöмаöсь абу ставсö. Торйöн кö, сёрниыс мунö биару нюжöдöм, капитальнöя стрöитчöм, а сідзжö ю-тыöн да муöн вöдитчöм кузя уджмогъяс юклöм кузя уджтасъяс олöмö пöртöм йылысь. В.Гайзерлöн кывъяс серти, кöть и зэв тöдчанаöсь тайö юалöмъясыс, сьöм овмöсын кризис вöсна найöс видлавны шуöма сёрöнджык. «Республикаса правительстволы кольöм во ковмис дугöдчыны öткымын абуджык тöдчана рöскодысь. Некымын уджтас кузя лои сёрнитчöма найöс збыльмöдöм могысь федеральнöй бюджетысь вичмöдöм сьöмсö вуджöдны 2009 во вылö»,--гöгöрвоöдіс КР-са Юралысьöс первой вежысь. Век жö депутатъяс вöзйисны босьтны тöд вылö, мый колö тырвыйö видзны федеральнöй бюджетысь вичмöдöм сьöмсö, торйöн нин экономикаын кризис дырйи.

«Республикалöн сьöмöн вöдитчöм кузя медтöдчана документ збыльмöдöм кузя кывкöртöд серти бюджетысь сьöмöн бурджыка вöдитчöм могысь Госсöветлöн да КР-са правительстволöн öтув зільöмыс сетіс позянлун кольöм во вичмöдны йöзлы став социальнöй кокньöдсö да татшöм ногöн регионын олöмыс эз омöльтчы»,--тöдчöдіс Б.Забровская.

Республикалöн бюджетын рöскод юкöнас унджык вöлі урчитöма вичмöдны муниципальнöй юкöнъяслы сьöмсö. Таысь öтдор, капитальнöя стрöитчöм кузя уджтас олöмö пöртöм вылö 2008 воын вичмöдöм сьöмыс, а сідзжö федеральнöй бюджетысь содтöдыс сетіс позянлун помавны кöкъямыс социальнöй учреждениелы водзті нин панöм стрöйбаяс, на лыдын Діюрын школа-детсад, Леткаын участкöвöй больнича да поликлиника, Изьваын челядьлöн спорткомплекс, Выльгортын йöзкостса ремеслöяслöн шöрин, Кулöмдінын водопровод.

* * *
2008 воын Коми Республикалöн бюджетын чöжöс юкöнас чукöрмис 35.333.688,6 сюрс шайт либö урчитöмсьыс 102,3 прöчент. Республикалöн 2008 вося бюджет йылысь оланпас серти урчитöм чöжöс дорас бюджетъяскостса трансфертъяссö артыштöмöн содтöд воис 809.111,6 сюрс шайт.

2007 воын серти кольöм во республикаса бюджетын чöжöс юкöныс содіс 8.077.069,8 сюрс шайт (29,6 прöчент). Сы лыдын содтöд воис 6.709.857,7 сюрс шайт вот (30 прöчент) да сідз чукöрмис 1.557.825,7 сюрс шайт. Та дырйи вотсö артавтöг чöжöсыс чиніс 190.613,6 сюрс шайт (20,4 прöчент).

Кывкöртöдъясын вайöдöм лыдпасъяс серти, республикалöн 2008 вося бюджетö вотыс воис 29.104.252,6 сюрс шайт, бюджет йылысь помöдз вынсьöдöм оланпасын артыштöм (28.520.936,6 сюрс шайт) серти 583.315,7 сюрс шайтöн (либö 2 прöчентöн) унджык. Бюджетын вот кузя став сикас чöжöсыс чукöрмис оланпас серти вынсьöдöмысь унджык.

Россия Федерацияса уна сикас бюджетысь содтöд бюджетъяскостса трансфертъяс тöд вылö босьтöмöн республикаса бюджетын рöскодсö арталöма 36.380.139,3 сюрс шайт, урчитöмсьыс 96,2 прöчент.

Новости : Выльторъяс
 


При использовании материала ссылка на сайт Государственного Совета
Республики Коми (gs.rkomi.ru) обязательна.

 

Webmaster