Новости : Выльторъяс
03-09-2009 

Коми Республикаса Государственнöй Сöветöн веськöдлысь Марина Истиховская ветлiс аслас уджмогъясöн Интаö


Сентябрь 1 лунö Интаö аслас уджмогъясöн волiс Коми Республикаса Государственнöй Сöветöн веськöдлысь Марина Истиховская.

«Менам школа» акциякöд йитöдын М.Истиховская нуöдiс 9 номера школаын восьса урок, аддзысьлiс «Интауголь» ВАК-са генеральнöй директор Дмитрий Добычинкöд, ветеранъяслöн карса сöвет президиумö пырысьяскöд, а сiдзжö вочавидзис сы дорö асланыс тöжд-могöн шыöдчысьяслöн юалöмъяс вылö.

Дмитрий Добычинкöд аддзысьлiгöн Госсöветöн веськöдлысь донъялiс, мый вöчсьö «Интаугольын» выль ногöн уджö босьтчöмкöд йитöдын, кыдзи водзö кутас сöвмыны компанияыс да кутшöм видзöдласыс та вылö сэнi уджалысьяслöн. Д.Добычин юöртiс, мый компанияын талун уджалö 2200 морт. «Йöзыс гöгöрвоöны, мый öнiя сьöкыдлунъяс дырйи ми ог вермöй тöдчымöн бурмöдны налысь олöмсö». Сiйö тöдчöдiс, мый удж вылысь чинталöм йöзлы сетасны став социальнöй кокньöдсö.

Ветеранъяслöн карса сöветын водзмöстчысьяскöд Марина Истиховскаялöн сёрниыс вöлi «Ылi Войвылысь да сыкöд öткодялöм районъясысь лунвылöджык мунысьяслы оланiн вылö субсидия сеталöм йылысь» оланпасö вежсьöмъяс пыртöм кузя вöзйöмъяс дасьтöм йылысь.

Татшöм вежсьöмъяссö пыртöм йылысь вöзйöмöн Госсöветö шыöдчис Госдумаысь Войвывлöн да Ылi Асыввывлöн тöжд-мог кузя комитетöн юрнуöдысь Валентина Пивненко. Госсöветса депутатъяс дасьтiсны нин такöд йитöдын ассьыныс вöзйöмъяс. Марина Истиховскаялöн видзöдлас серти, найöс колö донъявны Воркутаын да Интаын олысьяскöд öтвылысь.

Интаса ветеранъяс ошкисны депутатъяслысь вöзйöмъяссö сы кузя, мед сетны РФ-са субъектъяслы позянлун аслыныс юклыны федеральнöй бюджетысь воöм сьöмсö, лунвылын оланiнсö медвойдöр вичмöдны удж вылын пöгибнитöмаяслöн семьяяслы, а сiдзжö сетны субъектъяслы право вуджöдны войвылын олысь да уджалысь верстьö йöзöс (найö кö кöсйöны) асланыс регионса лунвыв районъясö.

Тайö вöзйöмъяссö водзö донъялöм бöрын мöдöдасны видлавны РФ-са Государственнöй Думалы.

Марина Истиховская сiдзжö аддзысьлiс сы дорö асланыс тöжд-могöн шыöдчысьяскöд да вочавидзис Интаын олысьяслöн 15 гöгöр юалöм вылö.

Новости : Выльторъяс
 


При использовании материала ссылка на сайт Государственного Совета
Республики Коми (gs.rkomi.ru) обязательна.

 

Webmaster