Новости : Выльторъяс
02-09-2009 

Сентябрь 1 лунö Интаын аслас школаö воліс Коми Республикаса Государственнöй Сöветöн веськöдлысь Марина Истиховская


Сентябрь 1 лунö Коми Республикаын заводитчис «Менам школа» акция. Коми Республикаса Государственнöй Сöветысь депутатъяс волісны школаясö, кöні асьныс велöдчисны, да нуöдісны восьса урокъяс.

Коми Республикаса Государственнöй Сöветöн веськöдлысь Марина Истиховская воліс Интаса 9 номера школаын первой классын велöдчысьяслы сиöм гаж вылö. «Ме нимкодьпырысь казьтыла ассьым велöдчан воясöс. Школаын менö зэв унаторйö велöдісны-туйдісны, медым лоны тöдчана мортöн»,--висьталіс М.Истиховская велöдчысьясöс чолöмалігöн. Велöдысьяс дорö шыöдчигöн сійö пасйис: «Медым быдтыны челядьöс бур йöзöн, колö пыдди пуктыны важся традицияяссö. Буретш тадзи вöчöны 9 номера школаын. Россияса педагогикаын медся тöдчанаыс—традицияяс».

Марина Истиховская нуöдіс 10-öд да 11-öд классъясын профессия бöрйöмлы сиöм восьса урок. Кыдз тыдовтчис ныв-зонкöд спикерлöн сёрнитігöн, найö кöсйöны лоны юристъясöн, экономистъясöн, милиционеръясöн, врачьясöн, инженеръясöн да рабочöйясöн. Сэк жö, асланыс челядьлöн висьталöм серти, 2015 воын, кор найö босьтасны вуз помалöм йылысь диплом, медся коланаöсь лоöны социальнöй тöдчанлуна да техническöй специальносьтъяс. Марина Истиховская воис накöд öти кывйö да вöзйис ныв-зонлы профессиясö бöрйигöн медвойдöр мöвпыштлыны, колана-ö лоас татшöмыс да позяс-ö аддзыны сы серти удж. «9 номера школаын сетöны челядьлы бур тöдöмлун. Школа помалысьяс пиысь унаöн нин шедöдісны олöмас гырысь вермöмъяс»,--сёрнисö помалігöн пасйис М.Истиховская.

Сентябрь 1 лунö асланыс школаясö волісны КР-са Госсöветысь мукöд депутат. Валерий Марков вöлі Удораын Кослан сиктса школаын, Виталий Габуев—Ухта районса УРМЗ посёлокса велöдчанінын. Сыктывса Визин сиктса школаын велöдчысьясöс чолöмаліс Алексей Цыпанов. Михаил Брагин воліс Сыктывкарса 21 номера школаö. Станислав Хахалкин чолöмаліс юркарса 36 номера школаын первой классö пырысьясöс. «Менам школа» акция мунас сентябрь 4 лунöдз.

Быд во сентябрь 1 лунö КР-са Госсöветысь депутатъяс нуöдöны республикаса школаясын парламентлы сиöм урокъяс. Таво парламентарийяс волісны та могысь регионса велöдчанінъясö нёльöдысь нин.

Новости : Выльторъяс
 


При использовании материала ссылка на сайт Государственного Совета
Республики Коми (gs.rkomi.ru) обязательна.

 

Webmaster