Новости : Выльторъяс
19-08-2009 

Коми Республикаын нимтöм на гöралы Вежа Степанлысь ним сетöм могысь вöзйöмсö ошкисны и федеральнöй тшупöдын


Федеральнöй государственнöй регистрация, кадастр да картография служба вöчис кывкöртöд, код серти шуöма сетны Войвыв кытшбердса Излöн нимтöм на гöралы «Вежа Перымса Степан гöра» ним. Тайö гöраыс Коми Республикаса «Печора» муниципальнöй районын, джудждаыс сылöн 1582 метр.

Тайö нимсö вöзйöмкöд йитöдын кывкöртöдсö, а сідзжö став колана кабаласö да документсö август 18 лунö Государственнöй Сöветöн веськöдлысь Марина Истиховская мöдöдіс Россия Федерацияса правительствоöн юрнуöдысь Владимир Путинлы.

Вежа Перымса Степанлысь нимсö гöралы сетöм йылысь шуöмлысь баласö Коми Республикаса Юралысь Владимир Торлопов вöзйис видлавны КР-са Госсöветлы 2009 вося майын. Депутатъяс ошкисны сійöс öтсöгласöн.

А водзмöстчисны такöд йитöдын «Россия Православная» öтмунöмлöн Коми Республикаса юкöн да Сыктывкарса да Воркутаса епископ Питирим. Государственнöй Сöветö аслас шыöдчöмын епископ тöдчöдіс, мый Вежа Степанлысь нимсö тадзи нэммöдöмыс лоö миян республикаса войтырöс бур оласногö туйдöм-ышöдöмын, налысь культура сöвмöдöмын торйöн нин тöдчанаöн да отсалас водзö ёнмöдны нэмöвöйся традицияяс, кодъясöс бöр босьтчисны ловзьöдны Коми муын.

Сыктывкарса да Воркутаса епархияын пасйисны, мый тайö гöраыс лоас Россияын медводдза на, кодлы нимсö сетöма вежа православнöй мортлысь.

Гöралы ним сетöмкöд йитöдын уджсö 2007 воын бласлöвитіс Москваса да став Русьса Патриарх Алексий II.
* * *
Вежа Степан, Перымса епископ, лöсьöдіс коми-зыряналысь медводдза анбур, пуктіс зэв важся коми литература кывлы подув, вöлі гижысьöн, вуджöдчысьöн, философöн, серпасасьысьöн, котыртіс медводдза коми школаяс, нимöдіс Кристослы эскöм Эжваса Перымын. Сыöн лöсьöдöм письменносьт паськаліс ставнас Коми-зыряна да Коми-перым муын.
Еннога небöгъясын Перымса Степанöс шуöны оз сöмын вежаöн, но и öткодялöны апостолкöд, сылысь уджъяссö орччаöдöны Русьöс православиеö пыртöдысь Великöй князь Владимирлöн, а сідзжö Кирилл да Мефодий вокъяслöн уджъяскöд.

Новости : Выльторъяс
 


При использовании материала ссылка на сайт Государственного Совета
Республики Коми (gs.rkomi.ru) обязательна.

 

Webmaster