Новости : Выльторъяс
03-08-2009 

«Комиинформ». Комиысь парламентарийяс дасьтöны войвылысь лунвылö овмöдчöм кузя федеральнöй оланпасъясö вежсьöмъяс пыртöм могысь вöзйöмъяс


Коми парламентысь депутатъяс дасьтöны федеральнöй оланпасъясö вежсьöмъяс пыртöм могысь вöзйöмъяс. Июль 24 лунö регионса парламентарийяс видлалiсны «Ылi Войвылысь да сыкöд öткодялöм районъясысь лунвылö мунысьяслы оланiн ньöбöм вылö субсидия сеталöм йылысь» 125 номера федеральнöй оланпасын тырмытöмторъяс.

Сöвещание вылас сёрнисö панiгöн Коми Госсöветысь вице-спикер Евгений Шумейко юöртiс, мый öнi Госдумаын лöсьöдöма 125-öд федеральнöй оланпасö вежсьöмъяс пыртöм кузя уджалысь котыр, кодöн юрнуöдö Госдумаысь Войвывлöн да Ылi Асыввывлöн тöжд-мог кузя комитетöн веськöдлысь Валентина Пивненко. Сiйö шыöдчис Госсöвет дорö вöзйöмöн донъявны тайö законсö да сетны сэтчö вежсьöмъяс пыртöм могысь вöзйöмъяс.

Евгений Шумейко сiдзжö пасйис, мый регионса Госсöветлöн, Юралысьлöн да правительстволöн, Комиысь Госдумаын сенаторъяслöн да депутатъяслöн зiльöмöн тöдчымöн унджык сьöм лои вичмöдöма войвылын олысьясöс лунвылö вуджöдöм вылö: 170 миллионсянь содтöма 1,5 миллиардöдз. Шуöма сiдзжö пыртны тайö уджтасас пöгибнитöм шахтёръяслысь семьяяссö. Öнi, вице-спикерлöн висьталöм серти, зiльöны водзö отсавны пöгибнитöм шахтёръяслöн семьяяслы: колö сувтöдны найöс торъя öчередьö да вичмöдны налы кризискöд йитöдын содтöд сьöм.

«Но мытшöд-падмöгыс зэв на уна. Сiдз, колö овмöдны лунвылö челядьдырсяньыс инвалидъясöс, кодъяс чужисны эз войвылын: танi олысь зэв уна ань нöбасиганыс да, тшöтш и врачьяслöн тшöктöм серти, кагасö вайны мунлiсны Россияса шöр да лунвыв районъясö. И артмис сiдз, мый налöн челядьныслöн, кöть и нэмсö олöны Войвылын, абу позянлуныс вуджны лунвылö», – висьталiс Евгений Шумейко.

Нöшта öти ёсь гöрöд йитчöма военнöйяскöд, кодъяс нэмсö служитiсны войвылын. Эм налöн военнöй стаж, а закон серти лунвылö овмöдчöм могысь колö сöмын уджалан стаж. «Та вöсна миянлы быть лоö мöдöдны найöс судö, и сöмын сэнi уна вын да кад воштöмöн босьтöны найö лунвылö овмöдчöм могысь право», – тöдчöдiс Коми минархстройысь отделса секторöн веськöдлысь Ольга Писклова.

Нöшта öти падмöг – войвылысь лунвылö овмöдчигöн муклюйтöм. Республикаысь архитектура, стрöитчöм да коммунальнöй овмöс кузя министрöс вежысь Вячеслав Козъяковлöн кывъяс серти, войвылын олысьяслы ковмö муклюйтны 125-öд оланпасын тырмытöмторъяс вöсна. Сiдз, воркутасаяс тшöкыда кырмалöны Москваын да Москва обласьтын оланiн ньöбöм могысь договор, но вуджöны овны Россияса мукöд «донтöмджык» регионö. «Квадратнöй метрыслысь донсö кö урчитны Россия пасьталаын шöркодя артыштöмöн, эз эськö кутны муклюйтнысö, и позис бурджыка вöдитчыны федеральнöй бюджетысь сьöмöн да унджык семьяöс овмöдны лунвылöджык», – висьталiс Евгений Шумейко.

Вице-спикер сiдзжö пасйис, мый Коми Республика эз нин öтчыдысь шыöдчыв федеральнöй шöринö корöмöн сетны позянлун регионъяслы öткодя юклыны войвылын олысьясöс лунвылöджык вуджöдöм вылö вичмöдöм сьöмсö, а сiдзжö овмöдны найöс тшöтш и Коми Республикалöн лунвылö. «Войвывсаяс оз ставöн вермыны овны Россиялöн лунвылын, дзоньвидзалунныс абу бур да, – гöгöрвоöдiс Евгений Шумейко. – Сэк жö шахтёръяскöд тшöтш войвылысь мунöны налöн челядьыс, внукъясыс, и республикаын öтарö чинö верстьö арлыда йöзыс».

Новости : Выльторъяс
 


При использовании материала ссылка на сайт Государственного Совета
Республики Коми (gs.rkomi.ru) обязательна.

 

Webmaster