Новости : Выльторъяс
03-08-2009 

«Комиинформ». Коми Республикаса правительстволöн зiльöмöн регионын экономикаыс эз ёна омöльтчы


Коми Республикаса правительстволöн зiльöмöн регионын экономикаыс эз ёна омöльтчы. Ассьыс татшöм видзöдлас висьталiс республикаса Юралысьöс первой вежысь, Комиын сьöм овмöсса министр Вячеслав Гайзер июль 24 лунö Госсöветысь бюджет, вот да экономическöй политика комитетын сöвещание дырйи. Сэнi сёрниыс вöлi мир пасьталаын кризис дырйи республикаса бюджетысь сьöмöн бурджыка вöдитчöм могысь регионса правительстволысь индöдъяс збыльмöдöм йылысь.

Вячеслав Гайзерлöн кывъяс серти, 2009 вося квайт тöлысьöн кольöм вося тайö кадын серти республикаса бюджетö вотыс воис 37,6 прöчентöн этшаджык. Сы лыдын 53,8 прöчентöн этшаджык вуджöдöма федеральнöй казнаö, 7,7 прöчентöн этшаджык – регионлöн öтувъя бюджетö. Во заводитчöмсянь став сикас бюджетас уджйöзыс содiс 1,5 прöчент да июль заводитчигöн артавсис 11,7 миллиард шайт нин.

«Такöд йитöдын республикаса правительство торйöн зiлис, мед экономикалöн став юкöныс уджалiс зумыда, и медтöдчана вöлi сетны налы государствосянь ыджыдджык отсöг. И тайö отсалiс венны кризискöд йитöдын сьöкыдлунъяссö», – пасйис республикаса Юралысьöс первой вежысь.

Сылöн висьталöм серти, талун эмöсь нин мусир перъян овмöсын бурланьö вежсьöмъяс. Содö вöчöмторйыс сёян-юан дасьтан предприятиеясын да вöр овмöсын.

«Та дырйи пыр унджык воö сiдз шусяна медшöр капиталö инвестицияыс да, мыйысь торйöн нин нимкодь, сьöмыс бара кутiс вичмыны стрöитчысьяслы. Волöн первой джынйын производстволöн индексыс вöлi 97 прöчент, матö кольöм воын мында жö. Республикаын талун та боксянь серпасыс Россия пасьталаын серти, кöнi тайö лыдпасыс 85,2 прöчент, тöдчымöн бурджык», – висьталiс Комиысь сьöм овмöсса министр.

Сылöн пасйöм серти, во джын помланьыс республикаын уджтöмалысьыс оз кут содны. Унатор лои вöчöма такöд йитöдын да, уджтöмалöм кузя серпасыс весиг бурмыштiс. Сiдз, во заводитчöмсяньыс уджтöмалöмыс содiс сöмын 0,8 прöчент, а гожöмнас кутiс чинны. Россияын тайö каднас уджтöмалöмыс содiс 2,1 прöчент.

Таысь öтдор, пасйис Вячеслав Гайзер, регионын инфляцияыс оз нин сод, талун сiйö артавсьö 7,5 прöчент (Россияын 7,4). Республикаса Юралысьöс первой вежысь казьтыштiс, мый весиг лючки сöвман 2007-2008 воясö Россияын шöркодя артыштöм серти Комиын инфляцияыс вöлi ёна ыджыдджык.

«Ме ог кöсйы шуны, мый регионын öнi ставыс зэв бур, но век жö позьö нин пасйыны, мый миян экономика оз нин усь увлань. Öнi республикаса правительство медвойдöр зiльö, мед водзö зумыда кутчысьны да босьтчыны промышленнöй производстволысь öдъяссö содтöм могысь уджö», – кывкöрталiс Вячеслав Гайзер.

Та дырйи сiйö пасйис, мый бюджетö вотыс воис урчитöм серти этшаджык да, вермас лоны, арнас парламентарийяслы ковмас бара на «чинталыштны» регионса казнаысь сьöмсö. Ылöсас артыштöмöн 1,5 миллиард шайт.

«Рöскод чинталöм кузя юалöмъяссö видлалiгöн медвойдöр ковмас босьтны тöд вылö сэтшöм социальнöй тöжд-мог, кодъясöс, быть шуöма збыльмöдны», – содтiс Комиын Юралысьöс первой вежысь.

Новости : Выльторъяс
 


При использовании материала ссылка на сайт Государственного Совета
Республики Коми (gs.rkomi.ru) обязательна.

 

Webmaster