Новости : Выльторъяс
03-08-2009 

2006-2008 воясö йöзöс велöдан, дзоньвидзалун видзан да социальнöя доръян учреждениеясын биысь видзчысьöм могысь бюджетысь вичмöдöм сьöмöн лючки вöдитчöм йылысь сёрни вöлi июль 21 лунö Коми Республикаса Государственнöй Сöветын чукöртчылöм дырйи


2006-2008 воясö йöзöс велöдан, дзоньвидзалун видзан да йöзöс социальнöя доръян учреждениеясын биысь видзчысьöм могысь бюджетысь вичмöдöм сьöмöн лючки вöдитчöм йылысь сёрни вöлi июль 21 лунö Коми Республикаса Государственнöй Сöветын чукöртчылöм дырйи.

КР-са Госсöветысь бюджет, вот да экономическöй политика комитетöн веськöдлысь Белла Забровскаялöн юрнуöдöм улын тайö юалöмсö видлалiсны республикаса парламентысь депутатъяс, йöзöс велöдан да дзоньвидзалун видзан министерствоясысь, социальнöя сöвман агентствоысь, а сiдзжö регионса видзöдан-артасян палатаысь чина йöз.

Тайö сöвещание дырйиыс найöс тöдмöдiсны республикаса видзöдан-артасян палаталöн кывкöртöдъясöн. Тайö учреждениенас веськöдлысь Ирина Борзиклöн висьталöм серти, республикаса öткымын районын биысь видзчысян оборудованиесö ньöбöмаöсь, сувтöдöмаöсь да уджöдöны некымын организация, кодъясöс гижöдöма öти и сiйö жö юридическöй адрес кузя да öти и сiйö жö морт вылö. Та дырйи тыдовтчис, мый öти муниципальнöй заказ кузя ордйысьöмаöсь кык татшöм организация, кодъяс пиысь öтисö бöрынджык шуöма вермысьöн. Сiдзжö торкалöмаöсь КР-са правительстволысь шуöмъяссö водзвыв сьöм мынтöмкöд йитöдын договоръяс кырымалiгöн, абу ставыс лючки и мынтысьöм кузя договоръясын, – пасйис Ирина Борзик.

Таысь öтдор, 2006-2008 воясö бюджет весьтö ньöбöм да учреждениеясын сувтöдöм нин оборудованиесö, кодi лыддьысис республикалöн эмбурöн, абу вуджöдöмаöсь муниципальнöй юкöнъясыслы. Кыдзи гöгöрвоöдiс Ирина Борзик, кык во чöж муниципальнöй учреждениеясын вöдитчöмаöсь республикалöн матö 50 миллион шайт дон эмбурöн, кöть и тайöс вöчны оз вöлi позь.

Сёрнисö помалöм бöрын депутатъяс тшöктiсны видзöдан-артасян палаталы 2010 воын донъявны, кыдзи исполнительнöй власьт тэчасъяс да муниципалитетъяс бырöдiсны эрдöдöм тырмытöмторъяссö. Таысь öтдор, Коми Республикаса правительстволы вöзйöма босьтны син улас госзаказъяс юклiгöн конкурсъясö да аукционъясö пырöдчысь öткымын йöзöс.

Новости : Выльторъяс
 


При использовании материала ссылка на сайт Государственного Совета
Республики Коми (gs.rkomi.ru) обязательна.

 

Webmaster