Новости : Публикации в СМИ
17-06-2009 

"Коми му" Тöдам олöмыслысь дон


Коми Республикаса Госсöветöн веськöдлысьöс вежысь Станислав Хахалкинлысь нимсö унаöн öнöдз йитöны «Афганистанса ветеранъяслöн Россияса союзлöн» Комиын котыркöд. И оз весьшöрö, öд сійö сизим во юрнуöдіс тайö котырнас да и талун пуктö ыджыд пай сылöн уджö. Буретш та йылысь и сёрнитім Станислав Юрьевичкöд, нöшта на и сы вöсна, мый лун-мöдöн водзджык Афганистанса ветеранъяс чукöртчылісны Сыктывкарын асланыс конференция вылö. Содтам сöмын, мый Станислав Хахалкин служитлöма 103-öд Витебскса воздушно-десантнöй дивизияын разведротаса командирöн. Гортас бергöдчöм бöрын Усинскса «афганечьяс» война тöдтöм уна сё морт пиысь пыр жö сорсьытöг казялісны Хахалкинöс да корисны асланыс кытшö. Тыдалö, сійö, коді ас синмöн аддзыліс вир кисьтана косьтö, мыйöнкö торъялö мукöдсьыс, и тайö торъялöмсö «аддзöны» сöмын сы кодь жö йöз.

– Кызь öти во сайын Льöмъюын медводдзаысь чукöртчим Афганистанын война пыр мунöм йöз, – висьталö котырыслöн артмöм йылысь Станислав Юрьевич. – Сэк кежлö Ухтаса, Сосногорскса, Усинскса афганечьяс öтувтчöмаöсь нин вöлі котыръясö. Воркутаын Андриан Кузьминлöн веськöдлöм улын весиг босьтчылісны оланін кыпöдны. Усинскын ми водзмöстчим Афганистанын усьöм воинъяслы памятник сувтöдöмын, лöсьöдім музей, сöвмöдім ассьыным традицияяс. Восьтім «Десантник» клуб, öні сійö шусьö «Патриот» да уджсö сэні нуöдö нин клубса вöвлöм быдтас. Сэкся чукöртчылігас öта-мöдлы отсалöм, чиновникъяслы паныд, кодъяс яндысьтöг шулывлісны косьяс пыр мунöм йöзлы, эг пö ми тіянöс сэтчö ыстöй, водзсасьöм могысь шуим лöсьöдны Афганистанса ветеранъяслысь республикаса котыр. Весиг уджтö сэки сьöкыд вöлі аддзыны, öд ветеранъяслы быть коліс патера сетны, мукöд кокньöдöн могмöдны. А сэсся странаын вежсьöмъяс пансисны, и «афганечьяслы» ставсö «прöститісны»–кокньöдъяс бырöдісны. Дыр эз кöсйыны ас коддьöмöн лыддьыны миянöс и Великöй Отечественнöй войнаса ветеранъяс. Сэсся найö вочасöн гöгöрвоисны, мый ми на моз жö вир кисьтана тышъяс пыр мунім. И кыдзи нö кутан патера корны, кор аддзан, мый Айму вöсна Ыджыд тыш вылысь воöмалöн на оланіныс абу. Миянöс öд ичöтсянь велöдісны пыдди пуктыны ветеранъясöс. Котырлöн талунъя могыс, чайта, сыын, медым ветеранъяс венісны мытшöдъяссö государствокöд öтув. И афганечьяс пöвстысь унаöн зільöны власьтлöн тшупöдъясын, веськöдлöны предприятиеясöн. Сідз, Магомед Османов юрнуöдö «Коми теплöвöй компания» восьса акционер котырöн, Андрей Дозморов – Ухтаса техническöй университетын проректор, Фазир Агаханов уджалö Емдін районса йöзöс уджöн могмöдан шöринöн веськöдлысьöс вежысьöн, Алексей Гордеев – «ЛУКОЙЛ»-са юридическöй службаын, Александр Пасечник – Коми Республикаса Юралысьлöн сöветник, Пётр Байда веськöдлö «Афганистанса ветеранъяслöн Россияса союзлöн» Коми регионса котырöн. Ухта карса сöветö депутатöн бöрйисны Евгений Тучнолобовöс, Емдін районсаö – Анатолий Новиковöс, Кулöмдін районса сöветöн веськöдлö Александр Кондрашкин. Позьö и водзö на лыддьöдлыны найöс, кодъяс вöчöны ставсö, медым миян страна вöлі вынаöн. Видзöдлас сертиыс ме эськö шуи найöс «государственникъясöн».

Ёна, дерт, кокньыдджык улич вылö петны да сэні аслад корöмъяс йылысь горзыны. Но ыджыдджык водзöсыс лоас, ветеранъяс йылысь оланпасъяссö тырвыйö збыльмöдöм могысь уджсö кö власьтлöн федеральнöй, регионъясса да меставывса тшупöдъясын зільысьяскöд öтув нуöдны. Кöть тайö и сьöкыдджык да синмö шыбитчытöмджык удж.

– Станислав Юрьевич, Усинскысь Сыктывкарö вуджöм бöрын мыйсянь босьтчинныд Афганистанса ветеранъяслöн республикаса котырын уджö?

– 2000-öд воас котырным меститчыліс кага ваян керкаса кык жырйын, юркарын овны аслым ковмис кöртымавны патера. Но пыр жö сюрисны ме моз мöвпалысь йöз, кодъяс кутісны ёна отсасьны уджын. Бöрынджык вуджим Первомайскöй уличса 78 номера керкаö, нуöдім благотворительнöй марафон, и 2002 во кежлö, позьö шуны, паськыда нин юöртлім ас йылысь, кутім ассьыным газет лэдзны, усьöм салдатъяслöн семьяяслысь сöвет котыртім.

Дас-кызь во сайын республикаын уджаліс сизимдас сайö патриотическöй клуб, талун жö колины сöмын сэтшöмъяс, кöні водзмöстчöны оз тшöктöм, а сьöлöмлöн корöм серти. Водзті татшöм клубъясыслы отсасисны гырысь предприятиеяс, профсоюз котыръяс. А öні отсöгыс абу, ёнджыкасö думайтöны сы йылысь, медым эськö дзикöдз эз тупкысьны. А öд ныв-зонмöс чужан му радейтöмöн быдтöм-велöдöмыс водзöссö ваяс уна во мысти на. Кöрткерöсын лöсьöдім республикаса патриотическöй шöрин. Медводдза воськовсö вöчöма, но водзö паськöдчыны ог вермöй, экономикаын сьöкыдлунъяс вöсна шöринсö сöвмöдны сьöмыс оз тырмы. Комиын чукöртöм вотсьыс сöмын 34 прöчентыс кольö республикаын, социальнöй уджтасъяс збыльмöдны тырмö на, а выль капитальнöй стрöительство вылö оз нин вичмы.

2005 воын Комиысь ветеранъяслöн 16 котыр лöсьöдісны координируйтысь сöвет. Öд могъясным миян öткодьöсь, кöть и уджалам быдöн асланым йöзкöд: öтияс –Афганистанса, мöдъяс – МВД-са, коймöдъяс – оборона министерствоса ветеранъяскöд… Но могъяснымöс кö уставаным пасйöма öткодьöс, коліс видзöдлыны, мый ми вермам öтув вöчны. Сёрöнджык сöветсö аслас борд улö босьтіс республикаса Юралысь, миянкöд тшöтш сэні уджалöны и ветеранъяс вöсна кывкутысь министерство-ведомствоöн веськöдлысьяс, и сэні ми вермам видлавны став тöжд-могсö. Ми вöзъям лöсьöдны федеральнöй власьт тэчас, медым сійö корсис ветеранъяскöд уджын нырвизьяс, дасьтіс оланпас балаяс, тöждысис томъяслысь чужан му дорö муслун чужтöм вöсна. Власьтлöн татшöм тэчасъяс эмöсь нин Европаса странаясын. Америкаын быдöн, коді медасьö öружиеöн дорйыны странаöс, тöдö, мый государство век отсалас сылы да сылöн семьялы, водзö сійö вермас дон вештытöг велöдчыны, босьтны ыджыд пенсия, вöдитчыны уна сикас кокньöдöн. Россияын колö жö татшöм власьт тэчасыс, кöні эськö Айму дорйысьлы отсалісны сійö кадсяньыс, кор мортыс босьтчис дорйыны Чужан мусö да сылöн олöм помöдз, мед эськö ветеранъясöс налöн котравтöг да корсьысьтöг могмöдісны оланпасъясын индöм кокньöдъяснас. А талун кежлö збыль вылас жö артмö, мый пытшкöсса делöяс кузя министерстволöн аслас ветеранъяс, оборона министерстволöн – аслас, виччысьтöм лоöмторъяс кузя министерстволöн, ФСБ-лöн, военкоматъяслöн – бара жö аслас. Ветеранъяслы отсалöны социальнöя сöвмöм кузя агентство, дзоньвидзалун видзан министерство, Пенсия фонд, соцстрах… И сизим видзысьлöн кагаыс дöзьöртöг кольö. Колö татшöм тэчасыс и сы могысь, медым дорйыны ветеранъясöс федеральнöй власьт водзын. Чечняын воюйтысьяслы дыр эз кöсйыны ветеран нимсö сетны, медводз ас дорö найöс сибöдім ми – «афганечьяс». Биа косьяс пыр мунöм йöзкöд öдйöджык аддзам öти кыв. Госдумалöн воддза созывса депутатъяс пöвстын «афганечыс» вöлі дас кöкъямыс морт, на лыдын Владимир Вшивцев, Франц Клинцевич, Сергей Житинкин, и найö уна вöчисны, медым вöлі вынсьöдöма Чечняын воюйтысьясöс ветеранъясöн лыддьöм йылысь оланпасыс.

– Кутшöм корöмъясöн шыöдчылöны котыраныд ветеранъяс?

– Тшöкыдджыка шыöдчöны оз асьныс найö, а гöтыръясыс, мамъясыс. Кодсюрö, гашкö, чайтö, котырас пö асьныс ас костас кутшöмкö сьöм ли мый юклöны, но ми тані уджалам. Кызвыныс зілям дон босьттöг, прöст кадö. Пыр кадся уджалысьыс сöмын нёль – аппаратöн веськöдлысь, бухгалтер, секретарь да усьöм салдат семьяяслöн сöветöн веськöдлысь Валентина Ивановна Воронова. Колö пасйыны, мый ветеранъяс пиысь унаöн лыддьöны, мый отсöгыс на дорысь кодлыкö колö ёнджыка. Кöрткерöс районса Дань сиктын гöтырыскöд да куим челядькöд батьыслöн важмöм нин керкаын олö Николай Борисов. Вöрын тракториставлöма и пöрöдчывлöма, а öні уджтöмалö. Сьöм тырмытöмла уна во нин оз вермыны эштöдны выль оланінсö. Челядьыс пыдди пуктöны бать-мамсö, öти праздник водзын керка весьтас кыпöдöмаöсь Россиялысь флаг, и öні на дöлалö сійö. А кокньöдсö оз кор, шуö, кодлыкö пö сійö меным дорысь коланаджык.

Афганистанса ветеранъяслы 18 квадратнöй метраа оланін ньöбöм могысь сетöны федеральнöй субсидия, быд метр вылö – комын сюрс гöгöр шайт. Квайтсё сюрссьыд Сыктывкарын патератö он нин ньöб. А семьяас кö нёль морт? Петан туйясысь öтиöн вермис эськö лоны, ветеранлы кö сетны тайö сьöмсö, торйöдны му да мед ачыс стрöитчис. Та вылын ми тшöтш уджалам.

Окота, мед эськö Афганистанса ветеранъяслöн районъясса, сикт-посёлокса котыръясын унджык вöлі олöмыслысь донсö тöдысь йöзыс, кодъяс радейтöны Чужан мусö да кöсйöны, мед сійö вöлі вынаöн. Но медводдза воськовсö вöчтöг туйсö вуджны öд он вермы. Миянлы, ветеранъяслы, аслыным колö водзмöстчыны, миян пыдди öд некод нинöм оз вöч, и девизным весиг сэтшöм – «Миян кындзи некод».


Павел Филимонов

Новости : Публикации в СМИ
 


При использовании материала ссылка на сайт Государственного Совета
Республики Коми (gs.rkomi.ru) обязательна.

 

Webmaster